Nyabur tu senyata ti pemadu iya besai reti ba pengawa kitai Iban. Nyabur tu ukai semina dikena kitai nyaga menoa, tang senyata tu mega dikena kitai ngadu ka pengawa gawai kitai Iban baka pengawa bebunoh babi (leboh niki ka orang mati ngagai rumah, leboh ngadu ka orang jadi salah serak, leboh munoh manok leboh meri anak mandi ba pendai, dikena mayar ukom tunggu ti berat, enggau maioh agi).
Nyabur tu enda tau digaga orang sengapa enti orang nya nadai kala badengah. Kabuah pia laban nyabur tu bisi sigi ukir keruit ti dikumbai “Butuh Kunding”. Nyadi ukir tu ditempa ba baruh rekong nyabur lalu ukir tu semina tau ditempa orang ke udah badengah (basah jari). Ulu iya juring serta panjai ari baruh. Nyabur tu nadai diukir baka duku ilang.
Langgai Tinggang Tauka Nyabur Indu
Enti orang nadai udah basah jari, iya semina tau ngaga mata nyabur nya aja lalu enda tau ngaga “butuh kunding”. Nyabur nya dikumbai orang “Langgai Tinggang” tauka “Nyabur Indu” lalu tau diukir baka duku ilang.
Langgai Tinggang (means the longest tail of a hornbill) tu senyata ti nyau deka sabaka enggau nyabur. Ulu iya sabaka enggau ulu duku ilang. Keruit iya segala lalu ditempa kira dua tunjok penyauh ari rekong duku. Enti iya nadai ditempa ka orang keruit, nyabur nya dikumbai nyabur indu. Keruit segala tu nadai pemali di tempa orang ke apin basah jari. Tang taja pia, jarang orang ke baru nemu ngamboh deka nguji ka bulu diri nempa keruit tu.
